確診個案？！

今早一瞪大眼，都未起床便叫小河馬替小狗子探熱．．．37度，很正常！　再睇睇個口腔！呀！好好，仲係有d痛！　不過果d紅色的瘡瘡生到一撻撻,仲多過昨晚三倍，周身都有，好痕!

等到個醫生回到診所再致電回覆狀況，趁有時間，食個早餐先！　　

匯報期間，醫生個語氣都冇乜問題，心想今次冇死啦，應該冇事啩。　點知個醫生一聽到d瘡瘡生多過昨晚三倍，即刻著狗子上急症急驗吓，不過都話可能有排等。　咁既情況下，梗係叫醫生幫手寫封信啦。

去到急症室登記時小河馬已即時遞交醫生封請願信，剛坐下取出小說等便聽見護士叫狗子到護士分流站(Triage Station)睇睇個環境先！

個護士一邊睇封轉介信，一邊替狗子量血壓，一望見雙狗手便著同事帶狗子入特別診症處(Special Consultation Area)作詳細檢查，仲唔俾小河馬伴同添呀！　狗子即時想起一套戲：D-9異形禁區 (District 9)

在特別診症處等待候間，小狗子很無聊地一邊睇埋本小說，一邊幻想小河馬攞住支AK-47入黎勇救小狗子．．．

等了一輪，終於見到個醫生入黎，佢好大概地望咗狗手同狗腳，仲有狗頸，check咗呼吸同睇咗口腔，問左少少問題，就話：其實都唔使抽血驗，你呢d咪手足口病囉，依家都有好多人好似你咁架，冇咩既．．．呀，你屋企有得隔架呵？！　得啦，你多d休息啦吓！　狗子：咁我可唔可以返工呀？！我隔離位同事係大肚架喎！　醫生：我會寫紙俾幾日病假你坐底等等啦。　真係簡單快捷！

小河馬的媽媽預咗狗子係中招，所以買定很多黑提子要狗子食多d，睇黎病假完結前都要繼續打擾小河馬的家。