2009年12月30日 星期三

戒口令

為咗調理好身體,狗子上網睇咗d生蛇既資料同戒口方面的資訊,結果在一個”南方隆中醫藥業”的網站發現以下資料,資料詳盡,頓時生無可戀…

忌用以下煮食方法:如煎、炒、炸、燒、焗、煙燻等
忌食以下類別食物及飲料:
肉類:牛、羊、公雞、鴨、鵝、叉燒、燒肉、乳豬
海鮮類:如蝦、蟹、白鱔、門鱔、牙帶、鯉魚、鯖魚、泥鯭、柴魚、魷魚
龍蝦、塘虱、油追、鮫魚
香料類:八角、小茴、丁香、玉桂、辣椒、沙薑、黑椒、胡椒、咖哩
疏菜類:竹筍、椰菜、芥蘭、茄子、芋頭、潺菜、通菜
水果類:香蕉、柿、大樹菠蘿、菠蘿、榴槤、芒果、柑、
小食糕點類:蝦片、薯片、薯條、雪餅、麵包、蛋糕、餅乾、米通、朱古力、
果仁[腰果、花生]
其它:鹵水料、沙嗲、芥醬、剌激性食品或飲料、酒精類飲品


總括而言,一切辛辣, 煎炸及腥味發物與我暫別,亦需避免肥甘膩滯之品。 咁講法,跟番上年十月中醫俾我張戒口紙照跟即可!!…今年年尾真係與眾不同!!!

2009年12月29日 星期二

蛇?!

狗子聖誕節前發現隻手手上有粒野,紅紅的,熱熱的,痕痕的,初時並未為意。  

直至最近掂一掂都痛到想死,終於決定睇醫生,點知醫生話呢d叫生蛇。  由一粒瘡瘡開始(好像baby咁),慢慢長大成為一條野<又或者響未成形之前,可以叫做一撻野>,顏色紅紅的,都幾靚架!  醫生話狗子之前出水荳時餘毒未清,休息不足,抵抗力弱,加上天氣寒冷,所以生蛇。  之前狗子有個上司因為生蛇,攪到半身不髄,都休息左成3﹣4個月至可以叫做行得走得,但都行動遲緩,真係有排至好得番,  之後仲有機會番發。

依家狗子淨係希望可以快點痊瘉,因為今天已是29號喇,過二天狗子想去機場接小河馬機,之後一齊回家梳洗,再去同佢d親友倒數(但要戒口,唔可以飲酒,嗚嗚...),之後一齊去行夜山,一齊去影星星,影日出!!

2009年12月17日 星期四

朋友

親愛的安眠藥,

同你分開左一天,我又要再投入你的懷抱。

原本以為個新的P.A上任,大家以後都可以不再相見,但佢今日走咗咯,仲走得很急,是今早零晨點幾鐘決定的。

狗子已經為左留佢而隱瞞左一d野,但最終都係功虧一簣。 大家各自檢討過,都冇對佢點。 小姐對住佢最多2個幾鐘,唔通咁都可以嚇走人?!

希望我地復合的日子不長,我唔想再成日要你幫忙,雖然你的味道不差。

狗子

2009年12月7日 星期一

人生如戲

話說小姐叫小狗子搬位,翌日財爺來到隨意選位俾佢兩個下屬,其中一個選中了狗子坐緊果個位置<前P.A個位>,所以狗子立即再搬位,搬回原本果個位置。

後尾收到風,小姐終於揀中左一位候選佳麗,新P.A.將於19號上任,狗子非常高興。 同日,狗子完成左幫小姐執好本咭片簿,點知小姐不滿意,話要教狗子分類及重新執過本咭片簿…原來小姐想公司的放埋一齊,朋友堆又分開另一Group!!! <都冇註明,鬼知咩~> 等陣,新P.A.都即將上任,點解重要教狗子?!

小狗子一想起個新人快上任,真係好開心,因為肩負2間酒店,其中一間翻裝修,又要玩吓新意思,都已經有排坃。又要攪新酒店d傢俬雜貨,仲要照顧東亞運動會、聖誕同埋小姐<呢個臨時既,所以冇加薪!! 好彩狗子已set好鬧鐘較好時間提醒幾時洗杯、倒水…同埋其他野,所以都冇乜甩漏。>,都冇乜時間剩。

點知今日傳來壞消息,據人事部稱,件囡囡著草,要再請人。 跟手人事部位小姐仲好好心咁安慰狗子︰頭先同小姐報告時,小姐都冇乜反應,亦都唔著急,應該冇事既,仲叫狗子放心云云…

2009年12月2日 星期三

偏偏選中我?!

周一,小姐個私人助理(P.A.)Last Day,Lunch小姐在蓉記設宴,大家食得開開心心。

成個飯局,由食之前到食完後,小姐一路都冇明確表示誰人暫代P.A.一職。 從種種跡像睇黎似係非狗子莫屬(個P.A.行開或放假,都係狗子補上),不論各同袍的睇法分析再加上狗子的感覺,都係向同一個方向進發。

到今日,終於揭盅。 小姐一回來就表示有2名Internal Auditor<我地的世仇>會搬進我地呢間房坐,老闆想佢地2個坐埋一齊,所以小狗子要搬竇。 有三個空位,搬去邊? 小姐話,狗子後面果一個位留番俾China Scouring果位新同事<請左幾個月都冇人申請果個職位>,而小姐房門前面細d果張枱則留番俾個新秘書 / P.A., 至於狗子,就會坐在舊秘書 / P.A.果個最大面積果個位(嚇!!),仲要即日搬。

同一時間,小姐終於明確表露︰響請到新的秘書 / P.A.之前,狗子要兼負呢個職位的職務!!!

有新嘗試當然歡迎,但狗子本身已唔夠時間分配給手頭上咁多個火頭,根本做唔切,自己都要靠好姊妹幫手撲滅火種。 薪水又冇得加<喂,暫時咋喎>,以呢間公司的作風,狗子怕如果自己的表現唔合格,肯定冇得加薪﹔咁如果合格,又分分鐘唔會請人!!<因為咁都可以攪掂,即係冇請人的必要!!>

仲可以點做?!