第二次行刑

上周六狗子又要行刑減肥啦~ 一開始當然又要度身磅重同埋量血壓啦。由於行電腦化，所以醫師可以直接在她們的電腦度收到即將接見個case既有關資料。

醫師睇完有關資料便入針炙房睇實物，可能狗子的變化不大，睇到咁上下便話了一句︰唉~都唔知你個針炙療效會唔會幫到你，我都係盡量架咋~ 人地一個星期黎二、三次，你就十幾日至黎一次!! 不過針炙係輔助，最緊要都係你自己節食同做多d運動!! 可能因為咁所以狗子强忍痛楚讓醫師加大電量，以增加療效。(不過上果次個護士都話個電流量會每次續少咁加上去~)

今次本來都很順利，除咗最尾最痛果一針!!! 醫師拮咗落去之後發現有發現有問題，即刻除落黎再拮過，等於響最痛個位插多你幾次，嗚嗚~

離開行刑房之後就遇見老友小草，同佢吹咗一輪，再同小河馬去做身體評估，原來佢同狗子係二種不同既體質，但都要行刑，超期待!! 狗子要拮三十針，唔知小河馬要拮幾多針?!

河馬拉狗

又是遊船河的大日子，狗子超期待的!! 尤以水槍乃必備之選!!!!

今次發生了很多很特的事，例如我們當中有一個朋友帶了他的小狗來一齊玩，狗子見牠游得累了，於是放牠在狗子的懷中讓牠可以躺在水泡上休息，頭果幾次都好地地的，怎料有一次見牠一邊游一邊嗚嗚低鳴，於是放了牠上水泡打算好好的安撫牠，怎料牠好像坐立不安似的，行來行去，每當牠企立時更擺出像踎塔作大便狀般的姿態 (嚇!!牠的那部位差不多對正狗子的正面，更加驚嚇!都唔知推唔推佢落水好~”~)!!! 最後牠行到狗子的背後，一個屁股坐在狗子的頭上…此情此景，全世界當然即時叫狗子及該小狗停定等佢影相拍照留念。 回想起來狗子仍然心有餘悸~.~”

第二個第一次就是旱鴨子的小狗子第一次直接由隻遊艇爬進海中暢泳<狗子没膽跳!!>，感覺很新鮮!! 狗子已經盡量放鬆，不過唔知係因為狗子都係太緊張定係乜，總之狗子經常都被水流沖到船底附近，或者向後溜!!! 有見及此小河馬都落水伴小狗子一齊游︰首先小河馬夾實一條浮膠條，小狗子則負責捉實刻條膠條的頭及尾，小河馬努力游藉此拖著狗子前進，就好像一架貨車拖頭拖著一個貨櫃!!

辛苦晒!!

履歷表

好想好想取一份來看看!! 好爆，好勁!

內地有年青人履歷表令招聘者目瞪口呆
(商台)2010年8月6日 星期五 13:07

內地網上近期流傳一些奇怪的履歷表，令招聘人員目瞪口呆。其中一份相信屬於一名八十後女孩子，形容自己除了長得較漂亮，就沒有特別學歷與專長，之前辭工，是因為有樓有車，不用為生活擔憂。有物流公司人事部經理，曾收過應徵信，申請人畢業半年，要求月薪五萬元，註明實力不夠的公司毋須找他；亦有人兩年轉工七次，但自我評價「性格穩重，忠誠度高」；或者在「優點」一欄，提到自己讀書多年，未試過遺失銀包。 另外，有申請人無留下手提電話號碼，但提供ＱＱ號碼，僱主與他聯絡，要先將申請人加入「好友」項目，並註明是「招聘」。更有申請人的照片，是輕托香腮的大頭特寫，而非一般證件相。

第一次針炙

今日小狗子進行第一次減肥中醫療程 ~ 針炙!!!

首先中醫師同小狗子了解一吓狗子日常生活的資料作分析，同埋睇吓狗子食完之前開果d中藥有冇d咩野問題，check完後再睇吓有冇需要再開份新的藥方，跟住醫師帶狗子上床行刑!!

當狗子躺臥在床上，心情即刻變得很緊張，一來怕會很痛，二來怕會很癢!!! 等候期間聽到醫師問鄰床的一位減肥療程的女士，傾談間聽到對方要拮四十幾針，個心即刻離一離~

終於到狗子喇~ 原來要拮三十針，心情即時緩和少許!! 原來拮針同狗子所想像的有很大分別，狗子以為︰例如狗子是水腫型肥胖的，一拮落d穴位度就會有條水柱射出!!! 原來現實絶對唔係囉~ 醫師聽完狗子的妙想，還以為狗子是海外流學回港呢~

醫師落針時很輕手，所以超癢，狗子差不多全程都極力忍笑，除咗某d位真的很痛!!! 拮晒上身後仲要駁電流加强其功效，希望真係得啦!!

做運動

狗子終於的起心肝，去睇中醫減肥~

最近家裹決定買張醫療床俾爸爸用，貪圖可調較床板的高低及方便爸爸調整睡姿，最主要係有圍欄!!!!!!!!!!!!!!!! 防止爸爸夢遊再次跌傷!

於是小狗子，小河馬及媽媽一齊努努執執執，終於騰空了一片空地等待醫療床的來臨。

趁這空檔，狗子又開始樂於努力做運動，加埋中藥，希望可以好快成功~.~a

時光機

近日爸爸由那打素醫院去大埔醫院，那兒環境比較闊落，護士們也比較細心及有較多時間照顧爸爸…探病時間亦有兩個時段，地理位置亦很接近屋企，方便媽媽探望爸爸。

探病時間為11:00 ~ 13:00及下午的17:00至19:00，對媽媽來說時間安排得非常好，只是…

小狗子及小河馬均在中上環區返工，朝09:00晚18:00，若我倆準時收工兼一離開公司便立刻有Lift及一落到街便立刻乘搭的士，再加上路路暢通，一到埗又即刻有Lift的話，可於18:50站於爸爸的床前!!!

但是否每次都可以這般順利?! 每次搭的士的錢錢也不少，所以盡可能也不想用這個方法! 如果車程短多dd就好咯~ 又或者咁，有部輕巧，可調較時間快慢的時光機就更perfect!!