小馬馬回來了

小馬馬離港工幹一段時間，終於回來了，狗子很開心。

小馬馬有手信俾狗子, 不過冇青稞酒，狗子都好開心。

小馬馬守信買咗馬奶酒送俾狗子，狗子很高興。

小馬馬倒晒d馬奶酒，清洗乾淨後才送個樽俾狗子。個樽係好靚，但狗子不大高興。

釘耙

昨天，小狗子突然想起有D野好耐冇做過，差不多成大半年冇做，連自己在家也懶得敷MASK。 心血來潮即刻打電話預約今天去做FACIAL.

原本狗子做開果個TREATMENT係無針導入果隻，專門對付暗瘡之類。 但技師表示狗子有某D部位既皮膚比較差，最好做一做呢個微針導入既醫學美容，專門排毒清污穢死皮。 個技師表示會有D乾，有少少痛，少少痕，仲有少少痺。

終於開始喇，真心說句，很痛!! 果吓野狗子覺得自己好似餐廳個廚房內的果塊豬扒牛扒，正在被廚師用鐵釘耙拍鬆D肉再上粉…又或者，享受緊中世紀歐洲用來刑罰和拷問的一種刑具~鐵處女（德語：Eiserne Jungfrau，英語：Iron maiden，也有稱為virgin of Nuremberg的）。

終於完了，原本有需要做呢個TREATMENT既地方果真冇乜問題，但原本膚質不錯的地方就出現晒果D野︰有D乾，有少少痛，少少痕，仲有少少痺。

P.S. 晚上自己洗面時更加赤痛，細心一看，有很多一撻撻又紅又腫的小塊區域。 即刻敷保濕MASK，早晚各一次，真係會冇咁痛喎。 狗子從未試過咁神心架!

鬥心

我地呢個部門每個同事加入左黎呢間公司之後頭二個星期內會有d野消失得無影無踪，遇到舊果個領隊仲加多少少自暴自棄，大家都失去鬥志，毫無士氣可言。

剛剛轉左個新領隊，由於公司的文化及模式，同埋實在太多新奇刺激的事情等住你，少d心血都會嚇死，大家都唔睇好會有好境來臨。

小狗子手頭上有個project，本來跟舊領隊馬馬合作。 呢個project已經時日無多，要盡快完成，管理員已不斷催促，只見領隊愛理不理，令狗子有種被盤冰水照頭淋的感覺。

依家同新領隊合作，情況都係咁嚴峻，但果種遺忘左好耐的鬥志即刻燃燒起來。 最起碼令員工有個感覺係大家有商有量，都會一齊去想法子解決問題，一齊去面對…大家真係合作緊!!! 呢d野，響舊領隊身上係唔會有架!!

婚禮的衫衫

由始終都會結婚，身邊各方友好亦好事近，小狗子同小河馬一直都有留意婚禮的一切事宜，當然包括衫衫。

小狗子想要一個好funny好難忘的婚禮，對於衣飾方面作出多方改動，例如兄弟班穿蘇格蘭裙，姊姊團就穿西裝…

而最新的想法係狗子、河馬及兄弟姊姊團都穿這個行禮!! 相信大家都應該會很高興很滿意的!!

減肥進行中…

話說狗子依然努力減肥中，開始略見成績…

今日小姐開始不回公司<好似為期一周,因為要工幹>，我地仝人慶賀，叫外賣慶祝!!

小狗子為保樣貌及身材，放棄左心愛的炸蝦多士，要了份咖央多士及一杯朱田壁合(朱古力加阿華田的愛情結晶)

同事們愛鍚狗子，各送了2塊x半份西多士，一隻滷水雞翼。

今餐下午茶真的很豐盛啊~

爸爸跌親

今朝幾恐怖, 梳洗完見到爸爸瞓左響地下度, 仲俾d衫壓住

佢今朝想去洗手間, 咁小狗子響入邊咁佢咪入唔到, 想行返去客廳坐, 點知條腰冇力失去重心想跌, 咪想搵d野扯住, 點知佢又捉錯左張木椅背, 咁啱張椅上便掛左d預備拆去乾衣機既衫, 咁咪連埋張木椅同d衫一齊跌底左。

咁佢又唔出聲, 狗子淨係聽到嘭一聲, 出到黎叫佢又唔應。 狗子望左好耐先見到佢瞓左響地, 仲問左佢一句"依?!你瞓響度做乜呀?!"

好在有隻oto馬仔頂住張木椅咋~

嚇死狗咯~