激死我啦~~

呢個世上最無藥可救的，非死蠢莫騷，仲要係果隻唔識聽人講野又要懶係醒既品種，簡直無得彈。

在狗子的身邊就有兩件，打孖上，雙重感受。 一個係負責各部門的主管，一個係隔離x事部新到的主管(其實比我早幾日到)。 由於上面果位哥仔想放手，採購俾我自己管理晒，所以我哋3個都有機會一齊開會，當然包括老閭的哥哥，因為佢日日都巡舖嘛。

事緣狗子要收拾的殘局太多，公司的技術及資源上又冇support，每晚回家後都要繼續開工找資料，根本無咩時間可言 ; 加上狗子比較新，呀大哥仔同d分店會熟d， 所以好多時呀哥仔落去開會d人有咩都會同佢講，打電話都省下。

但大家都信錯「好」人，以為同佢講咗會跟進，但佢只當各位發洩完就算，息事寧人。 所以分店有咩意見或投訴狗子永不知道，因為佢亦不會告訴有關部門。

所以上一次佢話同狗子落舖認識吓d人，睇吓下面的環境，真係以為落去打個白鴿轉咋~~ 原來佢一早約埋成班人開會，老闆的哥哥都有份，但亦因為同一原因，所以有很多野佢都唔知。 一去到就即刻開會，好有趣，狗子因為無知所以無事前準備，但原來個攪手自己都係咩都冇預備，我真係覺得好失敗囉。

人齊就插 ! 成班人輪住嚟插，好在狗子平時做足功課，加上有部PDA Phone坐陣，都嚇倒吓人，加上D對手的level太底，所以好快KO咗佢哋，但個死蠢哥仔為咗懶係好似有D貢獻咁，提出一個就算唔用個屁股想吓都知廢既意見俾狗子做，隔離部門個白痴又懶係野咁附和，狗子局做呢個白痴到唔恨的安排︰預告單，等佢哋知幾時有咩貨到喎~~

其實所有供應商都是今日落單明日到貨，如果有留意吓自己的ORDER就會知幾時到貨，但偏偏供應商有冇到貨又唔知，自己有冇簽收過都唔知，最抵死係佢哋連自己落咗咩ORDER都唔知，亦不會翻查， 等個幾兩個禮拜後冇貨時才打電話上嚟投訴話冇貨收， 叫佢哋收貨時睇緊D都有錯，忙吖麻，家陣好得閒CHECK呀? 咁做張咁既表有鬼用咩~~